ՆԱՏՕ-ում ՀՀ առաքելության ղեկավար Արման Իսրայելյանի հանդիպումը Հյուսիսատլանտյան խորհրդում Ամերիկայի Միացյալ Նահանգների մշտական ներկայացուցիչ Մեթյու Ուիթաքերի հետ

29 հունիսի, 2026

ՆԱՏՕ-ում ՀՀ առաքելության ղեկավար Արման Իսրայելյանը հանդիպում ունեցավ Հյուսիսատլանտյան խորհրդում Ամերիկայի Միացյալ Նահանգների մշտական ներկայացուցիչ Մեթյու Ուիթաքերի հետ։

Դեսպան Իսրայելյանը ներկայացրեց զրուցակցին 2026թ․ հուլիսի 7-ից 8-ը Անկարայում կայանալիք ՆԱՏՕ-ի գագաթնաժողովին ընդառաջ Հայաստանի մոտեցումները տարածաշրջանային վերջին զարգացումների վերաբերյալ և Հայաստանում անցկացված խորհրդարանական ընտրությունների արդյունքները։

ՀՀ առաքելության ղեկավարն ընդգծեց ԱՄՆ դերը կայունության և տարածաշրջանային կապակցվածության խթանման գործում, ներկայացրեց ԱՄՆ փոխնախագահ Ջեյ Դի Վենսի Հայաստան այցի մանրամասները և ՀՀ արտաքին գործերի նախարար Արարատ Միրզոյանի և ԱՄՆ պետքարտուղար Մարկո Ռուբիոյի միջև կայացած վերջին հանդիպման արդյունքները։

Կողմերը քննարկեցին Հայաստան-ՆԱՏՕ գործընկերությունը, ԹՐԻՓՓ նախագիծը և Հայաստանի դիմադրողականության ամրապնդմանն ու տարածաշրջանային կապակցվածության զարգացմանն ուղղված ընդգրկուն ջանքերը:

Դեսպան Իսրայելյանը շնորհավորեց իր գործընկերոջը ԱՄՆ անկախության 250-ամյակի առիթով՝ գոհունակությամբ արձանագրելով նախօրեին Բրյուսելում կազմակերպված ընդունելության գերազանց անցկացումը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր